✒️गेवराई प्रतिनिधी(नवनाथ आडे)मो:-9075913114
गेवराई(दि.30ऑक्टोबर):-तहसील कार्यालयाअंतर्गत दिली जाणारी विविध प्रमाणपत्रे, ही आता कोविड प्रतिबंधक लसीकरण केल्याचे प्रमाणपत्र सोबत जोडल्या शिवाय देऊ नयेत. तसेच त्याशिवाय कोणतेही अर्ज न स्विकारण्याचे सक्त निर्देश जिल्हाधिकारी राधाबिनोद शर्मा यांनी जिल्ह्यातील सर्व तहसील प्रशासनाला दिले आहेत. बीड जिल्ह्यात 52 टक्के नागरीकांनी कोविड प्रतिबंधक लसीचा पहिला डोस घेतलेला आहे.
या लसीकरण मोहिमेला गती देऊन 100 टक्के लसीकरण पूर्ण करण्यासाठी जिल्हा प्रशासनानाने कठोर पावले उचलली आहेत. याचाच एक भाग म्हणून जिल्हाधिकारी राधाबिनोद शर्मा यांनी जिल्ह्यातील सर्व तहसील कार्यालया अंतर्गत दिली जाणारी जात प्रमाण पत्र, नॉन क्रिमिलेअर प्रमाण पत्र, उत्पन्न प्रमाणपत्र आणि इतर विविध प्रमाणसाठी लसीकरण झाल्याबाबतचे प्रमाणपत्र सोबत जोडणे अनिवार्य करावे, असा आदेश निर्गमित केला आहे. त्यामुळे आता लसीकरण केल्याचे प्रमाणपत्र सोबत असेल तरच अर्ज स्विकारला जाईल आणि विविध प्रमाणपत्रे मिळतील अन्यथा मिळणार नाहीत. त्यामुळं आता रेंगाळलेल्या लसीकरणाला गती येण्याची शक्यता आहे
