✒️नागपुर(पुरोगामी संदेश नेटवर्क)

नागपूर(2 जुलै):-उधार दिलेले पैसे वसूल न करण्यासाठी गुन्हेशाखेच्या पोलिस निरीक्षकाने मारहाण करून युवकाकडील सोनसाखळी व ब्रासलेट हिसकावण्याचा प्रयत्न केला. या घटनेने पोलिस विभागाात खळबळ उडाली असून, युवकाने गृहमंत्री अनिल देशमुख व पोलिस विभागाकडे या पोलिस निरीक्षकाची तक्रार केली आहे. तक्रार दिल्यानंतरही अद्यापही निरीक्षकाविरुद्ध कारवाई न झाल्याने आश्चर्य व्यक्त करण्यात येत आहे.
राजा जमशेद शरीफ (वय २६, रा. एहबाब कॉलनी, अनंतनगर),असे तक्रारदार बिल्डर युवकाचे नाव आहे. राजाने दिलेल्या तक्रारीनुसार, डिसेंबर महिन्यात अशफाक अली (वय ५०) यांच्यासोबत राजाची ओळख झाली. अशफाक यांनी राजाला १४ लाख रुपये उधार मागितले. राजाने अशफाक यांच्याशी लिखित करार केला. त्यांना १४ लाख रुपये दिले. अशपाक यांनी दोन धनादेशही राजाला दिले. करारानुसार, मार्च महिन्यात अशफाक हे राजाला ही रक्कम परत करणार होते. मात्र, त्यांनी राजाला पैसे परत केले नाही. याचदरम्यान ९ मार्चला गुन्हे शाखेचे निरीक्षक विनोद चौधरी यांनी राजाला लाकडीपूल येथील कार्यालयात बोलाविले. १२ मार्च रोजी राजा गुन्हेशाखेच्या कार्यालयात गेला. चौधरी यांना राजाला शिवीगाळ केली. अशफाकला दिलेले पैसे विसरून जा, अन्यथा वाइट परिणाम होतील, अशी धमकी देत अशफाक यांना धनादेश व करारपत्र परत करण्यास सांगितले. राजाने नकार देताच चौधरी यांनी राजाला मारहाण केली. राजाकडील दागिने हिसकावण्याचाही प्रयत्न केला. मारहाणीत राजाला गंभीर दुखापत झाली. मेयोमध्ये प्राथमिक उपचार केल्यानंतर राजा खासगी हॉस्पिटलमध्ये दाखल झाला. तेथून सुटी मिळाल्यानंतर राजाने गृहमंत्री अनिल देशमुख, वरिष्ठ पोलिस अधिकारी व पोलिस उपायुक्त राहुल माकणीकर यांच्याकडे पोलिस निरीक्षकाने मारहाण केल्याची तक्रार केली.

सखोल चौकशी : सीपी
मारहाणीचे प्रकरण अत्यंत गंभीर आहे. तक्रारीची शहानिशा करून सखोल चौकशी करण्यात येईल. चौकशीनंतर दोषी आढळल्यास पोलिस निरीक्षकाविरुद्ध नियमानुसार कठोर कारवाई करण्यात येईल, असे पोलिस आयुक्त डॉ. भूषणकुमार उपाध्याय यांनी सांगितले.

क्राईम खबर , नागपूर, विदर्भ

©️ALL RIGHT RESERVED