✒️बीड,जिल्हा प्रतिनिधी(नवनाथ आडे)मो:-9075913114
बीड(दि.8सप्टेंबर):-दरवर्षीच्या वेळापत्रकाच्या सुमारे 15 दिवस अगोदर म्हणजेच 1 ऑक्टोबरपासून 2022-23 हंगामासाठी कारखान्यांना ऊस गाळप सुरू करण्याची परवानगी देण्याची शिफारस पुण्यातील साखर आयुक्तालयाने राज्य सरकारला केली आहे.चालू मोसमामध्येही ऊसाचे प्रमाण जास्त असण्याची शक्यता आहे. राज्यात ऊसाचे जास्त उत्पादन झाल्याने मागील हंगाम 15 जूनपर्यंत चालला होता.
मराठवाडा सारख्या भागात मागील ऊस गाळप करण्यास विलंब झाला होता. अतिरिक्त ऊसाचे गाळप करण्यासाठी साखर कारखाने सज्ज नसल्याने हजारो एकरावरील ऊस शेतकऱ्यांनीच नष्ट केल्याचे कृषी विभागाचे म्हणणे आहे. सहकार मंत्री अतुल सावे म्हणाले की, साखर आयुक्तालयाने गळीत हंगाम लवकर सुरू करण्याची सूचना केली आहे. तथापि, मुख्यमंत्री आणि उपमुख्यमंत्री यांच्या नेतृत्वाखालील समिती सप्टेंबरच्या मध्यापर्यंत यावर निर्णय घेईल. हंगाम लवकर सुरु केल्यास अतिरिक्त ऊसाचा प्रश्न उद्भवणार नाही.
