दंडकारण्यात ५० माओवादी ठार

✒️गडचिरोली(पुरोगामी संदेश नेटवर्क)

गडचिरोली(दि.14जुलै):-मागील वर्षभरात दंडकारण्यात पन्नासहून अधिक माओवाद्यांचा चकमकी आणि गंभीर आजाराने मृत्यू झाला आहे. जहाल माओवादी रामन्ना, सृजनक्काचाही यात समावेश असल्याची कबुली माओवाद्यांनी पत्रकातून दिली आहे.

दंडकारण्यात माओवाद्यांच्या चाळीस वर्षांपासून कारवाया सुरू आहेत. भारतातील चळवळीचा संस्थापक चारू मुजूमदारसह इतर ठार नेत्यांना श्रद्धांजली म्हणून माओवादी शहीद सप्ताह साजरा करतात. यंदा या सप्ताहापूर्वीच माओवाद्यांच्या दंडकारण्य दक्षिण सब झोनल समितीने पत्रक काढले. या माध्यमातून मागील वर्षभरात माओवादी चळवळीतील वरिष्ठ नेते, दलम सदस्य, जनमिलिशिया सदस्यांच्या मृत्यूची जाहीर कबुली देण्यात आली. या पत्रकात सर्वाधिक उल्लेख माओवाद्यांच्या दंडकारण्य झोनल समितीचा सचिव आणि दंडकारण्यात माओवादी संघटनेच्या विस्तारात महत्वपूर्ण भूमिका बजावणाऱ्या रमन्नाचा आहे. राहुल श्रीनिवास उर्फ रमन्ना हा जनताना सरकार समन्वय समितीचा अध्यक्ष आणि दक्षिण सब झोनल ब्युरोचा सचिव होता. गेल्या वर्षी आजारामुळे रमन्नाचा ७ डिसेंबर २०१९ला मृत्यू झाल्याने माओवादी संघटनेचे मोठे नुकसान झाल्याचे पत्रकात म्हटले आहे.

माओवाद्याच्या संघटनेत पश्चिम सब झोनल ब्युरोमध्ये असलेल्या गडचिरोली जिल्ह्याविषयी माओवाद्यांनी भूमिका मांडली आहे. यंदा गडचिरोली पोलिसांच्या सर्वाधिक यशस्वी चकमकीत महिला माओवादी सृजनक्काचा मृत्यू झाल्याचे म्हटले आहे. उल्लेखनीय म्हणजे दक्षिण गडचिरोलीत माओवादी संघटनेत नर्मदक्कानंतर सर्वाधिक सृजनक्का सक्रिय होती. गेल्या ३० वर्षांपूर्वी संघटनेत दाखल झाली होती. अलीकडच्या एटापल्ली तालुक्यात झालेल्या चकमकीत सृजनक्का ठार झाली होती. सृजनक्का ही माओवाद्यांच्या मिलिटरी कमांडचा प्रमुख संजीव उर्फ देवजीची पत्नी होती. तिच्या कार्याचा विशेष उल्लेखही पत्रात आहे. मागील २२ वर्षांत तिने स्वत:चा जीव देऊन दलम सदस्यांचे प्राण वाचविल्याचा दावाही करण्यात आला आहे. दक्षिण बस्तरमध्ये झालेल्या चकमकीत प्रहार अभियानांतर्गत ठार झालेल्या माओवाद्यांना खोट्या चकमकीत मारण्यात आल्याचा आरोप करण्यात आला आहे. यामध्ये बड्या कॅडरसह, दलम सदस्य आणि जनमिलिशिया सदस्यांचा उल्लेख आहे.

केंद्र सरकारवर तीव्र शब्दांत टीका करतानाच आत्मसमर्पण योजनेलाही या पत्रकातून लक्ष्य करण्यात आले आहे. आगामी २८ जुलै ते ३ ऑगस्टदरम्यान शहीद सप्ताह दंडकारण्यात साजरा करावा, असे आवाहनही माओवाद्यांच्या दक्षिण सब झोनल ब्युरोने केले आहे.

गडचिरोलीत आठ कॅडर ठार

गडचिरोली जिल्ह्यात माओवादी चळवळीला मोठा धक्का बसला आहे. डीव्हीसी स्तरावरची आठ कॅडर ठार झाले. नर्मदक्का आणि दिनकर या माओवाद्यांना अटक झाल्यामुळे चळवळीला हादरा बसला आहे. चळवळीचा जनाधार कमी होऊन माओवाद्यांविरुद्ध जनता पुढे येऊ लागली आहे. किष्टापूरमधून हे प्रामुख्याने दिसून आल्याची माहिती पोलिस अधीक्षक शैलेश बलकवडे यांनी दिली.