[जागतिक महिला दिन]
महिलांनी स्वतःच्या हक्कासाठी दिलेल्या लढ्याच्या स्मरणार्थ दरवर्षी ८ मार्च हा दिवस जागतिक महिला दिन म्हणून साजरा करण्यात येतो. दि.२८ फेब्रुवारी १९०९ रोजी न्यूयॉर्क येथे पहिला महिला दिन साजरा करण्यात आला असला तरीही सन १९१०च्या आंतरराष्ट्रीय महिला परिषेदत मांडलेल्या सुचनेनुसार ८ मार्च हा दिवस आंतरराष्ट्रीय महिला दिन म्हणून निश्चित करण्यात आला. काही देशात जसे बल्गेरिया आणि रोमानिया येथे हा दिवस मातृदिन म्हणून साजरा केला जातो. या दिवशी मुले आपली आई व आजी यांना भेटवस्तू देतात. तर इटलीमध्ये या दिवशी पुरुष महिलांना पिवळ्या मिमोसासची फुले भेट देऊन शुभेच्छा देतात. महिला दिन हा आपल्या स्त्रीत्वाचा अभिमान बाळगून त्याचा गौरव करण्याचा दिवस आहे. भारतात महाराष्ट्र राज्याची राजधानी मुंबई येथे पहिला महिला दिवस सन १९४३ साली साजरा झाला. पुढे सन १९७१ सालच्या ८ मार्चला पुण्यात एक मोठा मोर्चा काढण्यात आला होता. सन १९७५ हे वर्ष युनोने ‘जागतिक महिला वर्ष’ म्हणून जाहीर केले. त्यानंतर स्त्रियांच्या समस्या ठळकपणे समाजासमोर येत गेल्या. स्त्रियांच्या संघटनांना बळकटी आली. बदलत्या सामाजिक, आर्थिक, राजकीय, सांस्कृतिक परिस्थितीनुसार काही प्रश्नांचे स्वरूप बदलत गेले.तशा स्त्री संघटनांच्या मागण्याही बदलत गेल्या. आता बँका, शाळा, कार्यालयांमधूनही ८ मार्च साजरा व्हायला लागला आहे. सद्याच्या काळात जागतिक महिला दिन सर्वत्र साजरा होताना दिसून येतो.
संपूर्ण अमेरिका आणि युरोपसहित जवळजवळ जगभरातील स्त्रियांना विसाव्या शतकाच्या सुरुवातीपर्यंत मतदानाचा हक्क नाकारलेला होता. पुरुषप्रधान व्यवस्थेतील स्त्री-पुरुष विषमतेचे हे एक स्पष्ट उदाहरण. या अन्यायाविरुद्ध स्त्रिया आपापल्या परीने संघर्ष करीत होत्या. सन १८९०मध्ये अमेरिकेत मतदानाच्या हक्कासंदर्भात ‘द नॅशनल अमेरिकन सफ्रेजिस्ट असोसिएशन’ स्थापन झाली. परंतु ही असोसिएशनसुद्धा वर्णद्वेषी आणि स्थलांतरितांविषयी पूर्वग्रह असणारी होती. दक्षिणेकडील देशांना काळ्या मतदात्यांपासून आणि उत्तर व पूर्वेकडील देशांना तेथील बहुसंख्य देशांतरित मतदात्यांपासून वाचवण्याकरता स्त्रियांना मतदानाचा हक्क मिळायलाच हवा, अशा प्रकारचे आवाहन ती करत होती. अर्थात या मर्यादित हक्कांना बहुसंख्य काळ्या वर्णाच्या आणि देशांतरित कामगार स्त्रियांनी जोरदार विरोध केला आणि क्रांतिकारी मार्क्सवाद्यांनी केलेल्या सार्वत्रिक प्रौढ मतदानाच्या हक्कांच्या मागणीला पाठिंबा दिला. सन १९०७ साली स्टुटगार्ड येथे पहिली आंतरराष्ट्रीय समाजवादी महिला परिषद भरली. त्यामध्ये क्लारा झेटकिन या कम्युनिस्ट कार्यकर्तीने सार्वत्रिक मतदानाचा हक्क मिळवण्यासाठी संघर्ष करणे हे समाजवादी स्त्रियांचे कर्तव्य आहे, अशी घोषणा केली.
दि.८ मार्च १९०८ रोजी न्यूयॉर्कमध्ये वस्त्रोद्योगातील हजारो स्त्री-कामगारांनी रुटगर्स चौकात जमून प्रचंड मोठी ऐतिहासिक निदर्शने केली. दहा तासांचा दिवस व कामाच्या जागी सुरक्षितता या मागण्या केल्या. या दोन मागण्यांसह लिंग, वर्ण, मालमत्ता आणि शैक्षणिक पार्श्वभूमीनिरपेक्ष सर्व प्रौढ स्त्री-पुरुषांना मतदानाचा हक्क मिळावा, अशी मागणीही जोरकसपणे केली. अमेरिकन कामगार स्त्रियांच्या या व्यापक कृतीने क्लारा झेटकिन अतिशय प्रभावित झाली. सन १९१० साली कोपनहेगन येथे भरलेल्या दुसऱ्या आंतरराष्ट्रीय समाजवादी महिला परिषदेत दि.८ मार्च १९०८ रोजी अमेरिकेतील स्त्री-कामगारांनी केलेल्या ऐतिहासिक कामगिरीच्या स्मरणार्थ ८ मार्च हा ‘जागतिक महिला दिन’ म्हणून स्वीकारावा, असा जो ठराव क्लाराने मांडला, तो पास झाला. यानंतर युरोप, अमेरिका वगैरे देशात सार्वत्रिक मतदानाच्या हक्कासाठी मोहिमा उघडल्या गेल्या. त्यांचा परिणाम म्हणून सन १९१८ साली इंग्लंडमध्ये व सन १९१९ साली अमेरिकेत या मागण्यांना यश मिळाले. तरी आज घटकेला स्त्रियांवरील अन्याय, अत्याचार, असमानता व बलात्कार थांबलेले नाहीत.
यात पुरुषांची अरेरावी व मक्तेदारी पुर्णपणे दोषी असली तरी स्त्रीवर्गही यास कारणीभूत ठरत आहे. एक स्त्रीच दुसर्‍या स्त्रीवर हुकूमत गाजवत असल्याची बरीच प्रकरणे उघडकीस आली आहेत. पिता मुलीच्या जन्माने आनंदीत होतो, मात्र आईला ते खटकते. जगातील प्रेममूर्ती तीच आहे, सर्व भूमिकेतून ती प्रेमाचाच वर्षाव करते. आपण स्त्री व पुरुषांनी मिळून अशा प्रेममूर्ती स्त्रीजन्माचे स्वागतच करुया !स्त्रीत्वाचा सन्मान खरंतर शिक्षणसम्राट महात्मा फुले दांपत्याने केला. स्त्री-पुरुष समानतेचा लढा त्यांनी आजीवन लढला. स्त्रीमनात क्रांतीची ज्योत ज्ञानज्योती सावित्रीमाईने प्रज्वलित केली. यादिवशी त्यांचे जाणूनबुजूनच स्मरण करणे अगत्याचे वाटते. इ.स.१९७५ या जागतिक महिला वर्षाच्या निमित्ताने संयुक्त राष्ट्र संघटनेने आंतरराष्ट्रीय महिला दिन साजरा करण्याचे ठरविले. सन १९७७ साली संयुक्त राष्ट्र संघटनेच्या समितीने विविध सदस्यांना आमंत्रित करून ८ मार्च हा आंतरराष्ट्रीय स्तरावर महिलांचे अधिकार आणि जागतिक शांतता या हेतूने साजरा करावा म्हणून आवाहन केले होते.
!! आंतरराष्ट्रीय महिला दिनाच्या सर्व स्त्रीवर्गास हार्दिक शुभेच्छा !!
✒️संकलक व लेखक:-श्री कृष्णकुमार गोविंदा निकोडे गुरुजी.
‘बापू’ – श्रीकृष्णदास निरंकारी.(साहित्यिक व थोर पुरुषांचा इतिहास अभ्यासक)मु. पोटेगावरोड, रामनगर वॉर्ड नं.२०, गडचिरोली.पो. ता. जि. गडचिरोली भ्रमणध्वनी-७७७५०४१०८६.
