🔸“माझं घर, माझी जमीन अभियान करीता” आप पक्षाचे मुंबई प्रभारी धनंजय रामकृष्ण शिंदे यांचे आवाहन
✒️जगदीश का.काशिकर(विशेष प्रतिनिधी)मो:-९७६८४२५७५७
मुंबई(दि.20फेब्रुवारी):-रयतेचे राजे छत्रपती शिवाजी महाराजांच्या ३९३ जयंती दिनी, रविवार दिनांक १९ फेब्रुवारी २०२३ रोजी “माझे घर, माझी जमीन अभियान” या घरांच्या प्रश्नावर काम करणाऱ्या समविचारी लोकांच्या जनचळवळीची मुहूर्तमेढ रोवली गेली. वडाळा वेलफ़ेयर संक्रमण शिबीर क्र. १ व २ येथील हजारो रहिवाशांच्या घराच्या प्रश्नासंबंधी आयोजित बैठकीत “माझे घर, माझी जमीन अभियान” च्या सभेत अनेक नागरिकांनी आपल्या विविध अडचणी व भूमिका मांडली. या सभेत महिलांची संख्या लक्षणीय होती.
छत्रपतींना घडवणारी माता जिजाऊ आणि महिला शिक्षणाची मुहूर्तमेढ रोवणारी माता सावित्री बाई फुले यांच्या लेकी एकत्र येऊन आपल्या घरांच्या प्रश्नासाठी आंदोलन उभे करत आहेत हि अत्यंत अभिमानाची बाब आहे. ज्या आंदोलनात महिलांचा सहभाग मोठ्या प्रमाणात असतो ती आंदोलने यशस्वी झाल्याचा इतिहास आहे. छत्रपती शिवाजी महाराजांनी ज्याप्रमाणे सर्व जाती, धर्म व पंथाच्या लोकांना एकत्र येऊन रयतेचे राज्य म्हणजेच “स्वराज्य” स्थापन केले, त्या प्रमाणे आपण सर्वजण एकत्र येऊन राष्ट्रपिता महात्मा गांधींनी दिलेली “सत्य” व “अहिंसा” हि मूल्ये वापरत व घटनाकार डॉ बाबासाहेब आंबेडकर यांनी दिलेल्या संविधानाच्या चौकटीत जन चळवळ उभी करण्याची व ती यशस्वी करत शेवटच्या कुटुंबाला घर मिळेपर्यंत प्रामाणिकपणे संविधानिक मार्गाने लढण्याची शपथ उपस्थित नागरिकांनी घेतली.
महाराष्ट्रभर सर्वसामान्यांच्या घरांचे अनेक प्रश्न आहेत. काही भ्रष्ट राजकारणी, भ्रष्ट बिल्डर्स आणि प्रशासनातील भ्रष्ट अधिकाऱ्यांच्या संगनमताने सर्वसामान्यांचे घराशी संबंधित प्रश्न खूप जटिल बनले आहेत. त्यांचे जगणं मुश्किल झाले आहे. येत्या काळात “माझे घर, माझी जमीन अभियान” मार्फत सर्वसामान्यांच्या पुढील प्रश्नांवर प्रामुख्याने काम करण्यात येईल.
१. झोपडपट्टी धारकांच्या घरांचा प्रश्न
२. जुन्या चाळी व जागांचा विकास / पुनर्विकासासंदर्भातील प्रश्न
३. सोसाट्यांमध्ये राहणाऱ्या फ्लॅट धारकांचा “कन्व्हेयन्स” व “डीम्ड कॉन्व्हेयन्स”
वरील प्रश्नांवर काम करू इच्छिणाऱ्या महाराष्ट्रातील समविचारी कार्यकर्त्यांनी व जनतेने “माझे घर, माझी जमीन अभियान” या जन चळवळीत सहभागी व्हावे.
